اسلام آباد (نیوز ڈیسک)پیٹرول پمپ ڈیلرز ایسوسی ایشن نے منافع کی شرح میں اضافہ نہ ہونے پر ایک مرتبہ پھر ملک بھر میں پمپس بند کرنے کی وارننگ دے دی ہے۔
میڈیا رپورٹس کے مطابق وفاقی دارالحکومت میں پریس کانفرنس کے دوران چیئرمین پیٹرول پمپ ڈیلرز ایسوسی ایشن سمیع خان نے کہا کہ پیٹرولیم مصنوعات کی قیمتوں میں مسلسل اضافے کے باعث اخراجات میں نمایاں اضافہ ہو چکا ہے، جبکہ ڈیلرز کا مارجن انتہائی کم رکھا گیا ہے جس سے کاروبار چلانا مشکل ہو گیا ہے۔ انہوں نے خبردار کیا کہ اگر حکومت نے فوری طور پر مارجن میں اضافہ نہ کیا تو پمپ بند کرنے پر مجبور ہوں گے۔
اسی موقع پر ایسوسی ایشن کے رہنما ہمایوں خان نے بھی حکومت کی پالیسیوں پر تنقید کرتے ہوئے کہا کہ پیٹرول مہنگا ہونے کے باوجود ڈیلرز کو کوئی ریلیف نہیں دیا گیا۔ ان کے مطابق موجودہ صورتحال میں کاروبار متاثر ہو رہا ہے اور اگر مطالبات تسلیم نہ کیے گئے تو کئی پیٹرول پمپس خود ہی بند ہونا شروع ہو جائیں گے۔
