اسلام آباد (نیوز ڈیسک) حکومت نے پیٹرول سبسڈی سے مستفید ہونے کے عمل کو آسان بنانے کے لیے ایک اہم اقدام کرتے ہوئے موٹرسائیکل کی ٹرانسفر فیس عارضی طور پر ختم کرنے کا فیصلہ کیا ہے۔
میڈیا رپورٹس کے مطابق وفاقی وزیر داخلہ محسن نقوی نے اعلان کیا ہے کہ دارالحکومت میں موٹرسائیکل کی ملکیت کی منتقلی پر عائد فیس ایک ماہ کے لیے معاف کر دی گئی ہے۔ ان کا کہنا تھا کہ یہ اقدام وزیراعظم کے ریلیف پیکج اور سبسڈی اسکیم کے تحت کیا گیا ہے تاکہ زیادہ سے زیادہ شہری اس سہولت سے فائدہ اٹھا سکیں۔دوسری جانب ڈی جی ایکسائز عرفان میمن نے بتایا کہ اب شہری اسلام آباد میں بغیر کسی فیس کے اپنی موٹرسائیکل اپنے نام منتقل کروا سکتے ہیں۔ انہوں نے مزید کہا کہ عوامی سہولت کو مدنظر رکھتے ہوئے ایکسائز دفتر کو چوبیس گھنٹے کھلا رکھنے کا فیصلہ کیا گیا ہے۔
مزید برآں، بڑھتی ہوئی درخواستوں کے پیش نظر محکمہ ایکسائز میں اضافی کاؤنٹرز بھی قائم کر دیے گئے ہیں تاکہ شہریوں کو بروقت اور آسان خدمات فراہم کی جا سکیں۔
