اسلام آباد (نیوز ڈیسک) توانائی بحران کے پیش نظر وفاقی حکومت نے شہریوں کی نجی گاڑیوں کے لیے پٹرول کے استعمال کو محدود کرنے کا اصولی فیصلہ کر لیا ہے،

جس کے تحت ہر گاڑی کے لیے ماہانہ فیول کوٹہ مقرر کیا جائے گا۔رپورٹس کے مطابق ایران سے متعلق کشیدگی اور آبنائے ہرمز کی صورتحال کے باعث عالمی سطح پر تیل کی فراہمی متاثر ہوئی ہے، جس کے اثرات پاکستان پر بھی پڑ رہے ہیں۔ اسی تناظر میں حکومت نے فیول کے بہتر استعمال کے لیے پٹرول پمپس پر ڈیجیٹل نظام متعارف کرانے کا منصوبہ بنایا ہے۔اس نئے سسٹم کے تحت صارفین کو مقررہ حد سے زیادہ پٹرول حاصل کرنے کی اجازت نہیں ہوگی۔ اس مقصد کے لیے پٹرول پمپس پر جدید موبائل ڈیوائسز فراہم کرنے کی تیاریاں مکمل کر لی گئی ہیں، جبکہ متعلقہ ایپلی کیشنز کی جانچ بھی مکمل ہو چکی ہے۔ذرائع کے مطابق تقریباً 36 ہزار روپے مالیت کے جدید موبائل فونز پمپس کو فراہم کیے جائیں گے، جن کی خریداری کے اخراجات آئل مارکیٹنگ کمپنیاں برداشت کریں گی۔

نیشنل آئی ٹی بورڈ ان ڈیوائسز کو خرید کر اوگرا کے ذریعے کمپنیوں اور فیول اسٹیشنز تک پہنچائے گا۔مزید یہ کہ پاکستان ڈیجیٹل اتھارٹی کی تیار کردہ ایپ کے ذریعے فیول کی تقسیم اور استعمال کی نگرانی کی جائے گی۔ اس منصوبے کے لیے اوگرا کو کمپنیوں کو ضروری ہدایات جاری کرنے کا بھی کہا گیا ہے، جبکہ وزارت آئی ٹی نے اس کی تفصیلات منظوری کے لیے کابینہ ڈویژن کو بھجوا دی ہیں۔حکام کا کہنا ہے کہ موبائل ڈیوائسز کے معیار اور کارکردگی کی تصدیق ہو چکی ہے اور جلد ہی حکومت اس کوٹہ سسٹم کی مقدار کا باقاعدہ اعلان کرے گی۔