اسلام آباد (نیوز ڈیسک) وفاقی وزیر برائے مواصلات عبدالعلیم خان نے نیشنل ہائی وے اتھارٹی (این ایچ اے) کو ہدایت دی ہے کہ ٹول ٹیکس میں اضافے سے متعلق جاری کیا گیا

نوٹیفکیشن واپس لے لیا جائے۔انہوں نے اعلان کیا کہ 5 اپریل سے نافذ ہونے والا مجوزہ اضافہ فی الحال معطل کر دیا گیا ہے اور اس حوالے سے نیا حکم نامہ جاری کر دیا گیا ہے۔ وزیر کا کہنا تھا کہ موجودہ حالات میں عوام پر مزید مالی بوجھ ڈالنا مناسب نہیں۔عبدالعلیم خان نے مزید کہا کہ پیٹرول اور ڈیزل کی بڑھتی ہوئی قیمتوں کے باعث شہری پہلے ہی مشکلات کا شکار ہیں، اس لیے حکومت وزیر اعظم کی ہدایات کے مطابق عوام کو زیادہ سے زیادہ ریلیف دینے کی کوشش کر رہی ہے۔ ان کا کہنا تھا کہ موجودہ چیلنجز سے نمٹنے کے لیے قومی سطح پر یکجہتی ضروری ہے۔ان کی ہدایت پر این ایچ اے کی جانب سے یکم اپریل کو جاری کیا گیا ٹول ٹیکس میں اضافے کا نوٹیفکیشن معطل کر دیا گیا،

اور مالی سال 2025-26 کے دوران ٹول پلازہ فیس میں کوئی اضافہ نہ کرنے کا فیصلہ برقرار رکھا گیا ہے۔مزید برآں، وفاقی وزیر نے ایم 10 منصوبے کو مقررہ دو سالہ مدت میں مکمل کرنے کے لیے وسائل کے شفاف اور مؤثر استعمال پر بھی زور دیا۔