اسلام آباد (نیوز ڈ یسک) پیٹرولیم مصنوعات کی قیمتوں میں حالیہ اضافے کے بعد پبلک ٹرانسپورٹ کے کرایوں میں بھی ازخود اضافہ دیکھنے میں آیا ہے،

جہاں مختلف روٹس پر مسافروں سے زیادہ کرایہ وصول کیا جا رہا ہے۔میڈیا رپورٹس کے مطابق ٹرانسپورٹرز نے انٹرسٹی سفر کے کرایوں میں ایک ہزار سے لے کر ڈھائی ہزار روپے تک اضافہ کر دیا ہے۔ مثال کے طور پر لاہور سے کراچی کا کرایہ جو پہلے 8 ہزار 600 روپے تھا، بڑھا کر 12 ہزار روپے کر دیا گیا ہے۔اسی طرح لاہور سے اسلام آباد کا کرایہ 3 ہزار سے بڑھا کر 4 ہزار روپے، لاہور سے پشاور 3500 سے 4600 روپے، جبکہ لاہور سے سرگودھا کا کرایہ 1550 سے بڑھا کر 2550 روپے وصول کیا جا رہا ہے۔

اس کے علاوہ لاہور سے فیصل آباد کا کرایہ 1350 سے 2350 روپے، رحیم یار خان کا 4250 سے 5300 روپے، مری کا 3300 سے 4500 روپے اور ملتان کا 2800 سے 3700 روپے تک بڑھا دیا گیا ہے۔دوسری جانب متعلقہ حکام کا کہنا ہے کہ ابھی تک کرایوں میں کوئی سرکاری اضافہ نہیں کیا گیا۔ سیکرٹری آر ٹی اے کے مطابق نئی کرایہ فہرستیں ٹرانسپورٹرز سے مشاورت کے بعد تیار کی جا رہی ہیں اور قیمتوں کا تعین پیٹرولیم مصنوعات کی بڑھتی ہوئی لاگت کو مدنظر رکھ کر کیا جائے گا۔