لاہور (این این آئی)پنجاب حکومت کی ماحول دوست ای ٹیکسی اسکیم میں اہم پیش رفت ہو ئی ہے۔

اسکیم کے لیے اپلائی کرنے والے 380امیدواروں نے ڈائون پیمنٹ جمع کرا دی ہے۔ مجموعی طور پر اسکیم کے لیے 3لاکھ 50ہزار سے زائد امیدواروں نے درخواستیں کرادیں۔وزیر ٹرانسپورٹ بلال اکبر خان کا کہنا تھا کہ قرعہ اندازی کے بعد 1,100امیدواروں کو شارٹ لسٹ کیا گیا تھا اور ان میں سے کوالیفائی کرنے والے امیدواروں سے ڈان پیمنٹ کی ادائیگی کے لیے رابطہ کیا جا رہا ہے۔ اسکیم کے امیدواروں کی سکروٹنی کا عمل تقریبا مکمل کر لیا گیا ہے۔

پنجاب حکومت نے 6ارب روپے کی سبسڈی سے 1,100ای ٹیکسیز فراہم کرنے کی منصوبہ بندی کی ہے۔ اسکیم کے تحت ڈائون پیمنٹ کی کم از کم رقم 6لاکھ 50ہزار اور زیادہ سے زیادہ 8لاکھ 50ہزار روپے مقرر کی گئی ہے۔ ان کا مزید کہناتھا کہ ڈائون پیمنٹ جمع کرانے والے امیدواروں کو جلد ہی گاڑیاں فراہم کر دی جائیں گی۔ اسکیم میں کارپوریٹ سیکٹر، خواتین اور پروفیشنل ڈرائیورز کو ترجیح دی گئی ہے تاکہ ماحول دوست ٹرانسپورٹ کے فروغ کے ساتھ سماجی و معاشی فوائد بھی یقینی بنائے جا سکیں۔