اسلام آباد (نیوز ڈ یسک)عالمی سطح پر تیل کی قیمتوں میں غیر معمولی اضافہ دیکھنے میں آ رہا ہے،

جہاں برینٹ کروڈ تیزی سے بڑھتے ہوئے ایک بڑے ماہانہ اضافے کی جانب بڑھ رہا ہے۔ ماہرین کے مطابق جاری جنگ اور اس کے پھیلاؤ نے عالمی توانائی بحران کے خدشات کو مزید بڑھا دیا ہے۔بین الاقوامی خبر رساں اداروں کے مطابق برینٹ کروڈ کی قیمت میں 3.09 ڈالر کا اضافہ ہوا ہے جس کے بعد یہ 115.66 ڈالر فی بیرل تک پہنچ گئی، جبکہ ویسٹ ٹیکساس انٹرمیڈیٹ بھی بڑھ کر 102.56 ڈالر فی بیرل ہو گیا ہے۔اعداد و شمار کے مطابق صرف ایک ماہ کے دوران برینٹ کروڈ میں تقریباً 59 فیصد اضافہ ریکارڈ کیا گیا، جسے 1990 کی خلیجی جنگ کے بعد سب سے بڑا اضافہ قرار دیا جا رہا ہے۔ ماہرین کا کہنا ہے کہ اس تیزی کی بنیادی وجہ آبنائے ہرمز کی بندش ہے، جہاں سے دنیا کے تقریباً 20 فیصد تیل اور گیس کی ترسیل ہوتی ہے۔

صورتحال صرف خلیج تک محدود نہیں رہی بلکہ بحیرہ احمر اور باب المندب جیسے اہم سمندری راستے بھی خطرے میں آ گئے ہیں، جس سے عالمی تجارت متاثر ہونے کا خدشہ ہے۔مزید برآں کشیدگی اس وقت بڑھ گئی جب حوثی باغی نے پہلی بار اسرائیل پر حملے کیے، جس کے نتیجے میں تنازع مشرقِ وسطیٰ کے وسیع علاقے تک پھیل گیا اور صورتحال مزید پیچیدہ ہو گئی۔