اسلام آباد: وفاقی حکومت نے عوام کو کم قیمت پیٹرول فراہم کرنے کے لیے ایک ڈیجیٹل نظام متعارف کرانے کی تیاری شروع کر دی ہے، جس کے تحت موبائل ایپلی کیشن کا استعمال کیا جائے گا۔

اس منصوبے پر عملدرآمد کے لیے وزارتِ آئی ٹی نے پیش رفت کرتے ہوئے 24 ہزار موبائل فونز کی خریداری کے لیے اظہارِ دلچسپی طلب کیا ہے تاکہ فیلڈ میں ڈیٹا اکٹھا کرنے اور نظام کو مؤثر بنانے میں مدد مل سکے۔وفاقی وزیر برائے آئی ٹی شزا فاطمہ خواجہ کا کہنا ہے کہ اس اقدام کے لیے سرکاری خزانے پر کوئی بوجھ نہیں ڈالا جائے گا۔ ان کے مطابق موبائل فونز کی خریداری کے اخراجات آئل مارکیٹنگ کمپنیاں برداشت کریں گی، جبکہ ان کی قیمت کا تعین نیشنل انفارمیشن ٹیکنالوجی بورڈ کرے گا۔انہوں نے مزید بتایا کہ اس منصوبے کے تحت اوگرا کا ڈیجیٹل ڈیش بورڈ فعال کیا جا رہا ہے، جس کے ذریعے نہ صرف ڈیجیٹل ادائیگیوں کو فروغ ملے گا بلکہ پیٹرولیم سپلائی چین کی نگرانی، ڈیٹا انٹری اور شفافیت کو بھی یقینی بنایا جائے گا۔

وزیر آئی ٹی کے مطابق یہ اقدامات توانائی کے شعبے میں طویل المدتی بہتری لانے میں معاون ثابت ہوں گے۔ اوگرا ڈیش بورڈ کے ذریعے پیٹرولیم مصنوعات کی ترسیل میں رکاوٹوں کو کم کیا جا سکے گا اور سپلائی کے نظام کو جدید تقاضوں کے مطابق ڈھالا جائے گا۔