اسلام آباد (نیوز ڈیسک): پاکستان میں قدرتی گیس کے نئے اور بڑے ذخائر سامنے آنے کا دعویٰ کیا گیا ہے، جسے توانائی کے شعبے کے لیے ایک اہم پیشرفت قرار دیا جا رہا ہے۔

آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے اپنے جاری کردہ اعلامیے میں بتایا ہے کہ سندھ کے ضلع خیرپور میں واقع سہتو-1 نامی کنویں سے گیس کی کامیاب دریافت ہوئی ہے۔ کمپنی کے مطابق اس کنویں سے یومیہ تقریباً 17.2 ملین مکعب فٹ گیس حاصل کی جا سکے گی۔اعلامیے میں مزید کہا گیا کہ سہتو-1 کنویں میں 3390 پی ایس آئی کا پریشر ریکارڈ کیا گیا ہے، جو مضبوط ذخائر کی موجودگی کی نشاندہی کرتا ہے۔ اس کنویں کی کھدائی کا کام دسمبر 2025 میں شروع کیا گیا تھا، جبکہ 3870 میٹر کی گہرائی تک ڈرلنگ کے بعد گیس کے ذخائر تک رسائی حاصل ہوئی۔

کمپنی کے مطابق اس منصوبے میں او جی ڈی سی ایل کا حصہ 95 فیصد جبکہ جی ایچ پی ایل کا 5 فیصد ہے۔ ادارے کا کہنا ہے کہ اس نئی دریافت سے نہ صرف ملکی گیس کے ذخائر میں اضافہ ہوگا بلکہ توانائی کے جاری بحران میں بھی کچھ حد تک کمی آنے کی توقع ہے۔