اسلام آباد (نیوز ڈیسک) وزیراعظم شہباز شریف نے عید الفطر کے موقع پر وفاقی سرکاری ملازمین کے لیے اہم فیصلہ کرتے ہوئے ہدایت دی ہے کہ انہیں تنخواہیں عید سے پہلے ادا کی جائیں۔

وزیراعظم کی خصوصی ہدایات کے بعد متعلقہ سرکاری اداروں کو مراسلہ موصول ہو گیا ہے جس کے تحت ملازمین کو بروقت ادائیگی یقینی بنانے کے لیے عملی اقدامات شروع کر دیے گئے ہیں۔حکومت کا کہنا ہے کہ اس فیصلے کا مقصد سرکاری ملازمین کو عید کی تیاریوں میں سہولت فراہم کرنا ہے تاکہ وہ بروقت اپنی ضروریات پوری کر سکیں۔دوسری جانب حکومت نے عید الفطر کی تعطیلات کا بھی باضابطہ اعلان کر دیا ہے۔ جاری نوٹیفکیشن کے مطابق 20 اور 21 مارچ کو عید کی سرکاری چھٹیاں ہوں گی۔کابینہ ڈویژن کی جانب سے جاری اعلامیے کے مطابق ہفتے میں پانچ یا چھ دن کام کرنے والے سرکاری دفاتر میں جمعہ اور ہفتہ کو عید کی تعطیل ہوگی۔

اس کے علاوہ 22 مارچ کو اتوار اور 23 مارچ کو یومِ پاکستان کی سرکاری چھٹی ہونے کے باعث سرکاری ملازمین کو مسلسل چار دن کی تعطیلات میسر آئیں گی۔