وزیراعظم پاکستان کی جانب سے متعارف کرائی گئی مفت سولر اسکیم کے تحت مستحق افراد کے انتخاب کے لیے ڈیجیٹل قرعہ اندازی کے عمل کا باقاعدہ آغاز کر دیا گیا ہے۔

تفصیلات کے مطابق اس اسکیم کے تحت گلگت بلتستان میں اہل درخواست گزاروں کے چناؤ کے لیے جدید اور شفاف ڈیجیٹل سسٹم کے ذریعے قرعہ اندازی شروع کی گئی ہے۔نگراں وزیراعلیٰ گلگت بلتستان جسٹس (ر) یار محمد نے اس عمل کا باضابطہ افتتاح کیا۔ اس موقع پر ایڈیشنل چیف سیکریٹری مشتاق احمد نے بتایا کہ درخواست دہندگان کے انتخاب کے لیے مکمل طور پر شفاف اور جدید ٹیکنالوجی پر مبنی طریقہ کار اپنایا گیا ہے تاکہ حقیقی مستحقین تک یہ سہولت پہنچ سکے۔اس منصوبے کے تحت علاقے میں مجموعی طور پر 58 میگاواٹ کے سولر سسٹمز فراہم کیے جائیں گے۔ ان میں سے 40 میگاواٹ گھریلو صارفین کے لیے مختص ہیں جبکہ 18 میگاواٹ چھوٹے کاروباری اداروں اور آئی ٹی شعبے کے لیے رکھے گئے ہیں۔

صوبائی وزرا کا کہنا ہے کہ وزیراعظم کی یہ اسکیم گلگت بلتستان کے عوام کے لیے اہم سہولت ثابت ہوگی۔ ان کے مطابق اس منصوبے سے نہ صرف بجلی کی کمی پر قابو پانے میں مدد ملے گی بلکہ خطے کی معاشی اور سماجی ترقی میں بھی مثبت اثرات مرتب ہوں گے۔

حکام کے مطابق اس اقدام سے خاص طور پر آئی ٹی سیکٹر اور چھوٹے کاروبار کرنے والے افراد کو نمایاں فائدہ پہنچنے کی توقع ہے۔