کراچی (این این آئی)پاکستان نے کمرشل پروازوں کے طیاروں کے لیے استعمال ہونے والے جی پی ون فیول کی قیمت بھی بڑھا دی۔

حکومت نے طیاروں کے استعمال کے لیے جیٹ فیول کی قیمت میں 154 روپے فی لٹر کا بڑا اضافہ کر دیا ہے، جس سے جیٹ فیول کی قیمت 188.93 روپے سے بڑھ کر 342.37 روپے کی ریکارڈ سطح پر پہنچ گئی۔جیٹ فیول کی قیمت میں 82 فی صد کا ریکارڈ اضافہ ہوا ہے، جس سے ایئرلائنز کے کرایوں میں 5 ہزار روپے تک فی ٹکٹ اضافے کا امکان ہے، ایوی ایشن ماہرین کا کہنا ہے کہ جیٹ فیول کی قیمت میں اضافے سے ایئرلائنز اخراجات پورے کرنے کے لیے لازمی کرائے بڑھائیں گی۔

واضح رہے کہ حکومت نے پٹرول اور ڈیزل 55، 55 روپے فی لیٹر مہنگا کر دیا ہے، ایک لیٹر پٹرول 321 روپے 17 پیسے کا ہو گیا، ایک لیٹر ڈیزل 335 روپے 86 پیسے کا ہو گیا، مٹی کا تیل 130 روپے 8 پیسے مہنگا ہو کر 318 روپے 81 پیسے لیٹرہو گیا۔پیٹرولیم مصنوعات کے پہلے سے موجود ذخیرے کی قیمت میں اچانک بڑے اضافے سے ملک میں مہنگائی کا نیا طوفان اٹھنے کا شدید خطرہ لاحق ہو گیا ہے، مصنوعات اور سروسز فراہم کرنے والے اپنی قیمتیں بڑھا رہے ہیں لیکن سارا بوجھ عوام اور مزدوروں پر آ گیا ہے۔