اسلام آباد (این این آئی)پاکستان نے بھارت اور اسرائیل کے ممکنہ سائبر حملوں اور ہیکنگ کی روک تھام کیلئے مقامی سطح پر ای ڈی آر سسٹم تیار کر لیا ۔
ذرائع کا کہنا ہے کہ یہ جدید ترین اینٹی وائرس اور سائبر سیکیورٹی سافٹ ویئر تمام سرکاری کمپیوٹرز پر انسٹال کر دیا گیا ہے۔ اس سسٹم کو چلانے اور اس کی نگرانی کی ذمہ داری نیشنل سائبر ایمرجنسی رسپانس ٹیم کو سونپی گئی ہے۔ای ڈی آر سسٹم کے حوالے سے بتایا گیا ہے کہ یہ ڈیوائسز، کمپیوٹرز، سرورز اور موبائل فونز کی مسلسل نگرانی کرتا ہے اور انہیں ہر قسم کے سائبر خطرات سے محفوظ رکھتا ہے۔ ذرائع کے مطابق یہ سسٹم جدید سائبر حملوں، میل ویئر اور رینسم ویئر کو بروقت شناخت کرنے کی صلاحیت رکھتا ہے۔یہ مشکوک ڈیجیٹل سرگرمیوں کی فوری تحقیقات کرتا ہے اور کسی بھی حملے کی صورت میں خودکار طریقے سے ردعمل فراہم کرتا ہے، اس کا بنیادی مقصد سرکاری ڈیٹا کی چوری کو روکنا اور حساس ڈیوائسز کو ہیکنگ سے بچانا ہے۔ماہرین کے مطابق سسٹم کی تنصیب سے پاکستان کے سرکاری مواصلاتی ڈھانچے پر دشمن ممالک کے سائبر حملوں کے خطرات میں نمایاں کمی آئے گی اور ملکی ڈیٹا کی حفاظت کو یقینی بنایا جا سکے گا۔
