اسلام آباد (نیوز ڈیسک) سٹیٹ بینک آف پاکستان نے عیدالفطر کے موقع پر نئے کرنسی نوٹ حاصل کرنے کے خواہشمند شہریوں کے لیے طریقہ کار اور ہدایات جاری کر دی ہیں۔

میڈیا رپورٹس کے مطابق سٹیٹ بینک ہر سال کی طرح اس بار بھی رمضان کے دوسرے ہفتے میں 8877 شارٹ کوڈ سروس فعال کرتا ہے۔ اس سہولت کے تحت شہری اپنے موبائل فون سے ایک ایس ایم ایس بھیج کر نئے نوٹ حاصل کرنے کے لیے درخواست دے سکتے ہیں۔اس مقصد کے لیے صارفین کو پیغام میں اپنا شناختی کارڈ نمبر درج کرنے کے بعد ایک اسپیس دے کر متعلقہ بینک برانچ کا کوڈ لکھنا ہوگا اور یہ پیغام 8877 پر بھیجنا ہوگا۔ درخواست بھیجنے کے بعد شہریوں کو جواب میں ایک منفرد ٹرانزیکشن کوڈ اور متعلقہ بینک برانچ کا پتہ موصول ہو جاتا ہے۔

ایس ایم ایس موصول ہونے کے بعد درخواست دہندہ کو اصل شناختی کارڈ اور اس کی کاپی کے ساتھ متعلقہ بینک برانچ جانا ہوگا۔ بینک عملہ ٹرانزیکشن کوڈ کی تصدیق کے بعد عموماً 10، 20 اور 50 روپے کے نئے نوٹوں کے پیکٹ فراہم کرتا ہے۔اگر کسی وجہ سے 8877 سروس دستیاب نہ ہو یا مصروف ہو تو شہری براہ راست اپنی بینک برانچ سے بھی رابطہ کر سکتے ہیں۔ بیشتر کمرشل بینک اپنے اکاؤنٹ ہولڈرز کے لیے محدود تعداد میں نئے نوٹ محفوظ رکھتے ہیں اور انہیں ترجیحی بنیادوں پر فراہم کرتے ہیں۔

کراچی، لاہور اور اسلام آباد جیسے بڑے شہروں میں سٹیٹ بینک بینکنگ سروسز کارپوریشن کے دفاتر سے بھی نئے نوٹ حاصل کیے جا سکتے ہیں، جہاں یہ سہولت پہلے آئیں پہلے پائیں کی بنیاد پر فراہم کی جاتی ہے۔

اس کے علاوہ رمضان کے آخری عشرے میں بینک اے ٹی ایم مشینوں میں نسبتاً صاف ستھرے 500 اور 1000 روپے کے نوٹ لوڈ کرتے ہیں تاکہ لوگ عید کے موقع پر عیدی دینے کے لیے انہیں استعمال کر سکیں۔