اسلام آباد (نیوز ڈیسک) عیدالفطر کے موقع پر بچوں اور عزیز و اقارب کو عیدی دینے کی روایت بہت پرانی اور مقبول ہے۔
زیادہ تر لوگ عیدی نقد رقم کی صورت میں دیتے ہیں اور اس کے لیے عموماً بینکوں سے نئے اور تازہ کرنسی نوٹ حاصل کیے جاتے ہیں۔ اسی وجہ سے ہر سال عید سے قبل شہری مختلف مالیت کے نئے نوٹ حاصل کرنے کے لیے بینکوں کا رخ کرتے ہیں۔اس سال بھی عید سے پہلے سوشل میڈیا پر ایک نوٹیفکیشن گردش کر رہا ہے جس میں دعویٰ کیا جا رہا ہے کہ عیدالفطر کے لیے نئے کرنسی نوٹ جاری نہیں کیے جائیں گے۔ وائرل پیغام میں یہ بھی کہا گیا کہ اسٹیٹ بینک نہ صرف نئے نوٹوں کی فراہمی روک رہا ہے بلکہ انہیں حاصل کرنے کے لیے استعمال ہونے والی ایس ایم ایس سروس بھی بند کی جا رہی ہے اور عوام کو ڈیجیٹل ادائیگیوں کی طرف منتقل کیا جا رہا ہے۔
تاہم اسٹیٹ بینک آف پاکستان نے اس سوشل میڈیا نوٹیفکیشن کو مکمل طور پر جعلی قرار دیتے ہوئے اس میں کیے گئے دعوؤں کی تردید کر دی ہے۔ مرکزی بینک کے حکام کے مطابق نئے کرنسی نوٹوں کی عدم دستیابی سے متعلق کوئی باضابطہ نوٹس جاری نہیں کیا گیا۔اسٹیٹ بینک کا کہنا ہے کہ اگر اس حوالے سے کوئی اہم فیصلہ یا اعلان کیا جائے گا تو اسے سرکاری بیان کے ذریعے جاری کیا جائے گا۔ حکام نے شہریوں کو مشورہ دیا ہے کہ وہ غیر مصدقہ اطلاعات یا سوشل میڈیا پر گردش کرنے والے پیغامات پر یقین نہ کریں۔
مرکزی بینک نے مزید واضح کیا کہ نئے نوٹوں کی دستیابی سے متعلق کسی بھی مستند معلومات سے عوام کو صرف سرکاری میڈیا ریلیز کے ذریعے آگاہ کیا جائے گا تاکہ درست اور شفاف معلومات فراہم کی جا سکیں۔
