اسلام آباد(نیوز ڈیسک )ایران اور اسرائیل کے درمیان جاری کشیدگی اور امریکی مداخلت کے بعد عالمی منڈی میں خام تیل کی قیمتیں مسلسل اوپر جا رہی ہیں،

جس کے پیش نظر حکومتِ پاکستان نے اہم اقدام اٹھایا ہے۔مشرقِ وسطیٰ میں بڑھتی ہوئی غیر یقینی صورتحال کے باعث عالمی سطح پر تیل مہنگا ہو رہا ہے اور مختصر وقفوں کے بعد قیمتوں میں اضافہ ریکارڈ کیا جا رہا ہے۔ اسی تناظر میں حکومت نے پٹرولیم مصنوعات کی صورتحال پر کڑی نظر رکھنے کا فیصلہ کیا ہے۔وزیر خزانہ محمد اورنگزیب کی سربراہی میں 18 رکنی اعلیٰ سطح کی کمیٹی تشکیل دی گئی ہے، جو ملک میں پٹرولیم مصنوعات کی قیمتوں اور دستیاب ذخائر کا تفصیلی جائزہ لے گی۔ یہ کمیٹی روزانہ کی بنیاد پر طلب و رسد کی نگرانی کرے گی اور سپلائی کی صورتحال پر رپورٹ مرتب کرے گی۔مانیٹرنگ کے بعد تیار کی جانے والی رپورٹ باقاعدگی سے وزیراعظم شہباز شریف کو پیش کی جائے گی تاکہ بروقت فیصلے کیے جا سکیں۔

کمیٹی میں وزارتِ توانائی اور پٹرولیم کے اعلیٰ حکام، متعلقہ وزرا اور اسٹیٹ بینک کے گورنر سمیت دیگر نمائندے شامل ہوں گے۔