اسلام آباد (نیوز ڈیسک)  اقتصادی رابطہ کمیٹی (ای سی سی) نے کم لاگت ہاؤسنگ پروگرام میرا گھر میرا آشیانہ کے تحت قرض کی زیادہ سے زیادہ حد بڑھا کر ایک کروڑ روپے کرنے کی منظوری دے دی ہے۔

یہ فیصلہ وزیر خزانہ محمد اورنگزیب کی زیر صدارت منعقدہ اجلاس میں کیا گیا، جس میں معیشت اور ہاؤسنگ شعبے سے متعلق مختلف امور کا جائزہ لیا گیا۔ اجلاس میں پیش کی گئی سمری کی منظوری دیتے ہوئے گھروں کی تعمیر کے لیے قرض کی نئی حد مقرر کی گئی۔کمیٹی نے یہ بھی طے کیا کہ اسکیم کے تمام مستفیدین کے لیے شرح سود یکساں طور پر 5 فیصد ہوگی۔ اس کے ساتھ ساتھ پہلے سے جاری شدہ قرضوں کو بھی اسی نئی شرح پر منتقل کرنے کا فیصلہ کیا گیا ہے تاکہ صارفین کو ریلیف مل سکے۔

اعلامیے کے مطابق تھر کول ریل لنک منصوبے کے لیے 6.6 ارب روپے کی تکنیکی گرانٹ کی منظوری دی گئی، جس کا مقصد مقامی کوئلے کی پاور پلانٹس تک ترسیل کو بہتر بنانا ہے۔ مزید برآں، بارانی علاقوں میں زرعی پیداوار میں اضافے کے لیے 7.8 ملین روپے کی گرانٹ بھی منظور کی گئی۔

اقتصادی رابطہ کمیٹی کا کہنا ہے کہ یہ اقدامات نہ صرف ہاؤسنگ سیکٹر کو فروغ دیں گے بلکہ توانائی اور زراعت کے شعبوں میں بھی بہتری لا کر مجموعی معاشی استحکام میں معاون ثابت ہوں گے۔