اسلام آباد (نیوز ڈ یسک)ملازمین کی رخصتوں سے متعلق نئے ضوابط جاری کر دیے گئے ہیں
جن کے تحت اب گریڈ 17 تک کے سرکاری اہلکاروں کو زیادہ سے زیادہ 89 دن کی چھٹی کی منظوری دی جا سکے گی۔تفصیلات کے مطابق محکمہ صحت پنجاب نے تدریسی اسپتالوں اور دیگر سرکاری صحت مراکز میں فرائض انجام دینے والے طبی عملے کی چھٹیوں کے اختیار میں تبدیلی کر دی ہے۔ نئے احکامات کے تحت سینئر ڈاکٹروں کی رخصت منظور کرنے کا اختیار اسپتال انتظامیہ سے واپس لے لیا گیا ہے۔نئے طریقہ کار کے مطابق ٹیچنگ اسپتالوں کی انتظامیہ گریڈ 17 تک کے ملازمین کی زیادہ سے زیادہ 89 روز کی چھٹی منظور کر سکے گی۔ تاہم سینئر رجسٹرار، اسسٹنٹ پروفیسر، ایسوسی ایٹ پروفیسر اور پروفیسر سطح کے ڈاکٹروں کی رخصت کی منظوری اب براہِ راست محکمہ صحت پنجاب دے گا۔اسی طرح گریڈ 18 سے 20 تک کے جنرل کیڈر ڈاکٹروں کی چھٹی بھی اب صوبائی محکمہ صحت کی منظوری سے مشروط ہوگی۔
البتہ خواتین ڈاکٹروں اور دیگر عملے کو میٹرنٹی لیو اور عدت (بیوگی) کی چھٹی دینے کا اختیار بدستور اسپتال انتظامیہ کے پاس رہے گا۔یاد رہے کہ اس سے پہلے اسپتال سربراہان کو تمام ڈاکٹروں اور ملازمین کی 89 دن تک کی رخصت منظور کرنے کا مکمل اختیار حاصل تھا، لیکن تازہ فیصلے کے بعد یہ اختیارات صوبائی سطح پر منتقل کر دیے گئے ہیں۔
