اسلام آباد (نیوز ڈیسک) وفاقی دارالحکومت میں موٹر سائیکلوں پر ایم ٹیگ لگوانے کے لیے دی گئی مہلت اپنے اختتام کے قریب ہے اور شہریوں کے پاس اب صرف دو دن باقی رہ گئے ہیں۔
عرفان میمن، ڈی جی ایکسائز اسلام آباد، نے عوامی سہولت کو مدنظر رکھتے ہوئے آخری تاریخ میں توسیع کرتے ہوئے اسے 5 مارچ تک بڑھا دیا ہے۔ انہوں نے شہریوں کو متنبہ کیا ہے کہ وہ جرمانے یا قانونی کارروائی سے بچنے کے لیے مقررہ تاریخ سے پہلے اپنی بائیکس پر ایم ٹیگ نصب کروا لیں۔رمضان المبارک کے باعث ایم ٹیگ مراکز کے اوقات کار میں بھی رد و بدل کیا گیا ہے۔ مختلف مراکز پر 24 گھنٹے، 12 گھنٹے اور 8 گھنٹے کی شفٹوں میں عملہ خدمات انجام دے رہا ہے تاکہ زیادہ سے زیادہ افراد مستفید ہو سکیں۔
سرکاری اعداد و شمار کے مطابق اب تک 8 ہزار 928 موٹر سائیکلوں پر ایم ٹیگ لگایا جا چکا ہے، جن میں سے صرف گزشتہ ایک دن میں 2 ہزار 69 بائیکس پر ٹیگ نصب کیے گئے، جو ایک ریکارڈ تعداد ہے۔ اس کے علاوہ مجموعی طور پر 2 لاکھ 38 ہزار 80 گاڑیوں کو ایم ٹیگ جاری کیے جا چکے ہیں۔
ڈی جی ایکسائز نے شہریوں سے تعاون کی اپیل کرتے ہوئے کہا کہ ایم ٹیگ مہم کا مقصد ٹریفک کے نظام کو بہتر اور سفر کو محفوظ بنانا ہے۔ انہوں نے واضح کیا کہ بائیکیا اور آن لائن ٹیکسی سروسز کی رجسٹریشن کا عمل علیحدہ طور پر جاری ہے۔
