اسلام آ باد (نیوز ڈ یسک) حکومت نے پاسپورٹ سے متعلق قوانین میں اہم تبدیلی کرتے ہوئے شادی شدہ خواتین کو ایک نیا اختیار دے دیا ہے۔
نئے فیصلے کے تحت اب شادی شدہ خواتین اپنے پاسپورٹ میں شوہر کے بجائے والد کا نام برقرار رکھ سکیں گی۔ اس اقدام کو خواتین کی قانونی شناخت میں خودمختاری کی جانب پیش رفت قرار دیا جا رہا ہے۔یہ پیش رفت عدالتی احکامات پر عملدرآمد کے بعد ممکن ہوئی۔ لاہور ہائی کورٹ کی ہدایت کے بعد پاسپورٹ نظام میں ضروری ترامیم کی گئیں۔ حکام کے مطابق وزارت داخلہ اور وزارت قانون کی مشاورت سے پاسپورٹ سافٹ ویئر کو بھی اپڈیٹ کر دیا گیا ہے تاکہ نئی سہولت پر فوری عملدرآمد یقینی بنایا جا سکے۔
محکمہ پاسپورٹ کا کہنا ہے کہ اس ترمیم کے بعد خواتین کو اپنی شناختی دستاویزات میں نام کے اندراج سے متعلق زیادہ اختیار حاصل ہو گیا ہے، جس سے ان کی قانونی اور سماجی شناخت کو تقویت ملے گی۔
