اسلام آباد (نیوز ڈ یسک) حکومت نے قومی شناختی کارڈ کے سیکیورٹی نظام میں اہم تبدیلیوں کی منظوری دے دی ہے اور اس حوالے سے باضابطہ نوٹیفکیشن بھی جاری کر دیا گیا ہے۔
نئے قواعد کے تحت کارڈ کے تصدیقی اور حفاظتی فیچرز کو مزید مؤثر بنایا گیا ہے۔ترمیم شدہ ضوابط میں فنگر پرنٹس اور آئرس اسکین کو باقاعدہ قانونی حیثیت دے کر شامل کر لیا گیا ہے، جبکہ کیو آر کوڈ کو بھی ایک مستند سیکیورٹی اور تصدیقی فیچر کے طور پر تسلیم کر لیا گیا ہے۔ کیو آر کوڈ کے ذریعے آن لائن اور آف لائن دونوں طریقوں سے فوری تصدیق ممکن ہو سکے گی۔حکام کے مطابق کیو آر کوڈ یا دیگر جدید تکنیکی خصوصیات مائیکرو چِپ کے متبادل کے طور پر استعمال کی جا سکیں گی۔ مزید یہ کہ اگر کسی شہری کا شناختی کارڈ معطل کیا جاتا ہے تو اس سے وابستہ تمام تصدیقی اور توثیقی سہولیات بھی فوری طور پر غیر فعال ہو جائیں گی۔
نئے فیصلے کے تحت 60 سال یا اس سے زائد عمر کے افراد کو تاحیات مؤثر اسمارٹ شناختی کارڈ جاری کرنے کی سہولت بھی فراہم کی جائے گی۔
