اسلام آباد (نیوز ڈیسک)آئی فون کے شوقین افراد کے لیے اہم پیش رفت سامنے آئی ہے کہ ممکنہ طور پر آئی فون 18 پرو سیریز اور

فولڈ ایبل آئی فون رواں سال ستمبر میں بیک وقت متعارف کرائے جا سکتے ہیں۔ماضی کی اطلاعات میں کہا گیا تھا کہ ایپل اپنی آئندہ آئی فون 18 سیریز کی حکمتِ عملی میں تبدیلی کرتے ہوئے پہلے صرف پرو ماڈلز پیش کرے گا اور بنیادی ماڈلز کی لانچ اگلے برس تک مؤخر کر دے گا۔ تاہم تازہ رپورٹ بتاتی ہے کہ کمپنی اپنے پہلے فولڈ ایبل فون کو بھی انہی پرو ماڈلز کے ساتھ متعارف کرانے کا ارادہ رکھتی ہے۔چینی سوشل میڈیا پلیٹ فارم ویبو پر سامنے آنے والی ایک پوسٹ کے مطابق فولڈ ایبل آئی فون کی اسکرین جولائی میں بڑے پیمانے پر تیار ہونا شروع ہو جائے گی۔ یہ شیڈول اس لیے اہم سمجھا جا رہا ہے کیونکہ اسی عرصے میں آئی فون 18 پرو اور پرو میکس کے ڈسپلے بھی پیداوار کے مرحلے میں داخل ہوتے ہیں۔ایپل کے روایتی پراڈکٹ سائیکل کو مدنظر رکھا جائے تو جولائی میں ماس پروڈکشن شروع ہونا عموماً ستمبر کے اوائل میں لانچ ایونٹ کی طرف اشارہ کرتا ہے۔

اگر تمام مراحل منصوبے کے مطابق مکمل ہوئے تو کمپنی ستمبر میں پرو ماڈلز کے ساتھ اپنے پہلے فولڈ ایبل فلیگ شپ کی باضابطہ رونمائی کر سکتی ہے۔