اسلام آباد (نیوز ڈیسک )یورپ میں رہائش کے خواہشمند بیرونِ ملک پاکستانیوں کے لیے خوش آئند پیش رفت سامنے آئی ہے،
کیونکہ اسپین نے ایک نیا اور نسبتاً آسان طریقہ متعارف کرایا ہے جس کے ذریعے اہل افراد ایک سالہ رہائشی کارڈ کے لیے درخواست دے سکیں گے۔اس حوالے سے ایک اعلیٰ سطحی اجلاس کی صدارت وفاقی وزیر داخلہ محسن نقوی اور وزیر برائے اوورسیز پاکستانیز سالک حسین نے کی، جس میں بیرونِ ملک مقیم پاکستانیوں کو قانونی سہولتیں اور تحفظ فراہم کرنے کے عزم کا اعادہ کیا گیا۔اجلاس کے دوران وزارت خارجہ پاکستان نے اس رہائشی کارڈ کے عمل میں مکمل تعاون کی یقین دہانی کرائی، جبکہ اسپین میں تعینات پاکستانی سفیر ڈاکٹر ظہور احمد نے شرکا کو تفصیلی بریفنگ دی۔ حکام نے واضح کیا کہ یہ سہولت سیاسی پناہ لینے والوں کے لیے نہیں بلکہ مخصوص اہلیت رکھنے والے درخواست گزاروں کے لیے ہے۔فیصلہ کیا گیا کہ درخواست دینے والوں کو کریکٹر سرٹیفکیٹ سمیت تمام ضروری دستاویزات جمع کرانا ہوں گی۔ ابتدائی طور پر ایک سال کا رہائشی کارڈ جاری کیا جائے گا، جبکہ سات سے آٹھ برس کی مدت مکمل کرنے کے بعد مستقل رہائش اور شہریت کے امکانات پیدا ہو سکتے ہیں۔مزید یہ طے پایا کہ مختلف اداروں کے الگ الگ سرٹیفکیٹس قبول نہیں کیے جائیں گے،
بلکہ نیشنل پولیس بیورو ایک متحدہ قومی کریکٹر سرٹیفکیٹ جاری کرے گا تاکہ تصدیقی عمل تیز اور سہل بنایا جا سکے۔محسن نقوی کا کہنا تھا کہ حکومت ہر مرحلے پر درخواست گزاروں کو سہولت فراہم کرے گی، جبکہ سالک حسین نے اس اقدام کو ہزاروں پاکستانیوں کے لیے قانونی حیثیت حاصل کرنے کا اہم موقع قرار دیا۔
