اسلام آباد (نیوز ڈیسک) بینظیر انکم سپورٹ پروگرام کی چیئرپرسن سینیٹر روبینہ خالد نے رمضان المبارک سے قبل

مستحق خواتین کے لیے اہم اعلان کرتے ہوئے بتایا ہے کہ سہ ماہی مالی امداد میں اضافہ کر دیا گیا ہے۔ نئی رقم کے مطابق اب مستحقین کو 13 ہزار 500 روپے کے بجائے 14 ہزار 500 روپے ادا کیے جائیں گے۔ ایکسپریس نیوز کی رپورٹ کے مطابق بی آئی ایس پی ہیڈکوارٹرز اسلام آباد میں منعقدہ لائیو ای کچہری کے دوران انہوں نے کہا کہ بینظیر کفالت پروگرام کی قسط میں ایک ہزار روپے کا اضافہ کیا گیا ہے تاکہ ضرورت مند خاندانوں کو زیادہ مالی سہارا مل سکے۔ انہوں نے مزید بتایا کہ بینظیر تعلیمی وظائف اور نشوونما پروگرام کے تحت دی جانے والی امداد میں بھی 500 روپے کا اضافہ کر دیا گیا ہے، جس کا مقصد ماؤں اور بچوں کی بہتر دیکھ بھال یقینی بنانا ہے۔

روبینہ خالد نے مستحق خواتین کو ہدایت کی کہ وہ اپنی مکمل رقم وصول کریں اور کسی بھی غیرقانونی کٹوتی کو ہرگز قبول نہ کریں۔ اگر کسی کو شکایت ہو تو بی آئی ایس پی کی ہیلپ لائن 080026477 پر رابطہ کریں یا قریبی دفتر جا کر مسئلہ درج کروائیں۔