کراچی(این این آئی)اسٹیٹ بینک آف پاکستان نے ملکی کرنٹ اکائونٹ کے تازہ اعداد و شمار جاری کر دیے،

جس کے مطابق جنوری میں کرنٹ اکائونٹ خسارے سے نکل کر سرپلس میں آ گیا۔اسٹیٹ بینک کے اعلامیے کے مطابق جنوری کے دوران ملکی کرنٹ اکائونٹ 12 کروڑ 10 لاکھ ڈالر سرپلس ریکارڈ کیا گیا، جب کہ دسمبر میں کرنٹ اکائونٹ 39 کروڑ ڈالر خسارے میں تھا۔ماہانہ بنیاد پر کرنٹ اکائونٹ میں بہتری کی بڑی وجہ ترسیلاتِ زر اور برآمدات میں اضافہ ہے، جس کے باعث بیرونی کھاتوں کا توازن بہتر ہوا۔ تاہم سالانہ بنیاد پر صورت حال مختلف رہی اور بڑھتی ہوئی درآمدات کے باعث کرنٹ اکائونٹ میں تنزلی دیکھی گئی۔اعداد و شمار کے مطابق رواں مالی سال کے پہلے سات ماہ میں کرنٹ اکائونٹ خسارہ ایک ارب ڈالر سے تجاوز کر چکا ہے، جب کہ گزشتہ مالی سال کے اسی عرصے میں کرنٹ اکائونٹ 56 کروڑ ڈالر سرپلس تھا۔