اسلام آباد (نیوز ڈٖیسک)ملک کے مختلف حصوں میں آٹے کی قیمتوں میں غیر معمولی اضافے نے مہنگائی سے دوچار عوام کے لیے نئی پریشانی کھڑی کر دی ہے۔ پہلے ہی روزمرہ اخراجات میں اضافے سے تنگ شہری اب بنیادی خوراک کی بڑھتی قیمتوں کے باعث شدید دباؤ کا شکار ہو رہے ہیں۔ وفاقی ادارہ شماریات کی تازہ رپورٹ کے مطابق محض ایک ہفتے کے دوران آٹے کے 20 کلوگرام کے تھیلے کی قیمت میں مختلف شہروں میں نمایاں اضافہ دیکھا گیا، جو 40 روپے سے لے کر 590 روپے تک ریکارڈ کیا گیا ہے۔
اعداد و شمار کے مطابق وفاقی دارالحکومت اسلام آباد میں آٹے کے 20 کلو تھیلے کی قیمت میں سب سے زیادہ اضافہ ہوا، جس کے بعد اس کی قیمت بڑھ کر 2 ہزار 893 روپے تک جا پہنچی۔ رپورٹ میں بتایا گیا ہے کہ سرگودھا میں ایک ہفتے کے دوران آٹے کے تھیلے کی قیمت میں سب سے زیادہ 590 روپے کا اضافہ ہوا، جبکہ ملتان میں قیمت 226 روپے 66 پیسے بڑھ گئی۔ اسی طرح خضدار میں 200 روپے، بہاولپور میں 163 روپے 33 پیسے اور کوئٹہ میں 140 روپے اضافے کا سامنا کرنا پڑا۔دیگر شہروں کی بات کی جائے تو گوجرانوالہ میں آٹے کے 20 کلو تھیلے کی قیمت 134 روپے بڑھی، اسلام آباد اور راولپنڈی میں 120 روپے تک اضافہ ہوا۔ کراچی، پشاور، سکھر اور لاڑکانہ میں آٹے کی قیمت 100 روپے بڑھ گئی، جبکہ حیدرآباد اور سیالکوٹ میں 80 روپے، بنوں میں 50 روپے اور لاہور میں 40 روپے اضافہ ریکارڈ کیا گیا۔
مزید تفصیلات کے مطابق راولپنڈی میں آٹے کے 20 کلو تھیلے کی قیمت بڑھ کر 2 ہزار 866 روپے، پشاور میں 2 ہزار 850 روپے اور بنوں میں 2 ہزار 800 روپے ہو چکی ہے۔ کوئٹہ میں آٹا 2 ہزار 660 روپے جبکہ کراچی میں 20 کلو کا تھیلا تقریباً 2 ہزار 600 روپے میں فروخت ہو رہا ہے۔ آٹے کی قیمتوں میں اس مسلسل اضافے کے نتیجے میں مہنگائی سے پہلے ہی پریشان عوام کی مشکلات میں مزید اضافہ ہو گیا ہے۔
