اسلام آباد (این این آئی)حکومت اور اپوزیشن کے درمیان مذاکرات کیلئے رابطہ ہوگیا۔نجی ٹی وی کے مطابق بانی پی ٹی آئی کی جانب سے قومی اسمبلی کے نامزد اپوزیشن لیڈر اور تحفظ آئین پاکستان تحریک کے سربراہ محمود خان اچکزئی کو مشترکہ دوست کے ذریعہ وفاقی وزیر کا پیغام پہنچا دیا گیا ہے۔
محموداچکزئی کو پیغام دیا گیا ہے کہ حکومت مذاکرات پر اپنے اتحادیوں سے مشاورت کر رہی ہے جو مکمل ہوتے ہی اپوزیشن سے باقاعدہ مذاکرات کے لیے رابطہ ہوگا۔حکومتی ذرائع کے مطابق سپیکر قومی اسمبلی کا اپوزیشن لیڈر کے نوٹیفکیشن کے لیے محمود خان اچکزئی سے رابطہ ہے اور سینئر سیاستدان کی جانب سے سپیکر کو مطلوبہ دستاویزات فراہم کر دی جائیں گی جس کے بعد محمود اچکزئی کو اپوزیشن لیڈر کا مقرر کیے جانے کا نوٹیفکیشن متوقع ہے۔پی ٹی آئی ذرائع کے مطابق حکومتی مشاورت سے لگتا ہے کہ وہ مذاکرات میں سنجیدہ ہے۔
