اسلام آباد (این این آئی)صدر آل پاکستان انجمن تاجران اجمل بلوچ نے 16جنوری کو ملک بھر کے چوک بند کرنے کا اعلان کر دیا۔احتجاجی ریلی سے خطاب کرتے ہوئے اجمل بلوچ نے کہا کہ تاجر برادری پوائنٹ آف سیل قانون کو مکمل طور پر مسترد اور اسے کالا قانون قرار دیتی ہے۔اجمل بلوچ نے کہا کہ ایف بی آر کے اہلکار مبینہ طور پر رشوت وصول کر رہے ہیں اور پی او ایس سسٹم نہ لگانے پر تاجروں کو 5لاکھ روپے تک کے جرمانے عائد کیے جا رہے ہیں۔

انہوں نے الزام لگایا کہ ایف بی آر میں کرپشن کھلے عام ہو چکی ہے، جس کی وجہ سے معیشت کا پہیہ جام ہو گیا ہے اور ملک بھر میں 70فیصد تک خرید و فروخت کم ہو چکی ہے۔صدر انجمن تاجران نے کہا کہ صنعتوں کی بندش کے باعث ملک شدید معاشی بحران کا شکار ہے جبکہ سرمایہ کاری دبئی اور دیگر بیرونِ ملک منتقل ہو رہی ہے۔ انہوں نے کہا کہ ایم این ایز اور وزرا مہنگی گاڑیوں میں گھوم رہے ہیں، جو ان کے بقول فلائی اوورز اور انڈر پاسز کے کمیشن کا پیسہ ہے۔انہوں نے واضح کیا کہ نہ صرف ملک بھر کے چوک بند کیے جائیں گے بلکہ اسلام آباد میں سری نگر ہائی وے کو بھی بلاک کیا جائے گا۔اجمل بلوچ نے مطالبہ کیا کہ شوکت عزیز کے دور کی طرح ایف بی آر کو ختم کیا جائے، اور کہا کہ تاجر برادری ڈبل ٹیکس دینے کو بھی تیار ہے، مگر موجودہ نظام کسی صورت قبول نہیں کیا جائے گا۔