اسلا م آباد(نیوز ڈ یسک )لاہور کے علاقے اچھرہ میں جیولری مارکیٹ کے تاجروں کو اُس وقت شدید دھچکا لگا جب امانتاً رکھایا گیا 20 کلو سے زائد قیمتی سونا لاپتہ پایا گیا۔پولیس کے مطابق مختلف سناروں نے اپنا سونا شیخ وسیم اختر نامی جیولر کے سپرد کر رکھا تھا۔ کئی روز تک اس شخص کے دکان پر نہ آنے پر تاجروں نے شکوک و شبہات کے باعث دکان کے تالے توڑ کر لاکر کھولا تو اندر سے بھاری مقدار میں رکھا گیا سونا غائب تھا۔

متاثرہ تاجروں کا دعویٰ ہے کہ لاپتہ ہونے والے سونے کی مقدار 20 کلو سے زائد ہے جس کی مالیت تقریباً ایک ارب روپے بنتی ہے۔ اس کے علاوہ ایک دکاندار کے مطابق شیخ وسیم تقریباً 60 لاکھ روپے کی کمیٹی کی رقم بھی لے کر غائب ہو چکا ہے۔پولیس نے بتایا کہ دکان دار محمد احمد کی جانب سے درخواست موصول ہونے پر تھانہ اچھرہ میں کارروائی شروع کر دی گئی ہے اور واقعے کی ہر پہلو سے تفتیش کی جا رہی ہے۔