اسلا م آباد (نیوز ڈیسک) ریاض میٹرو کو دنیا کے سب سے بڑے مکمل طور پر خودکار (ڈرائیور لیس) ٹرین نیٹ ورک کے طور پر گنیز ورلڈ ریکارڈ میں شامل کر لیا گیا ہے۔سعودی پریس ایجنسی (ایس پی اے) کے مطابق یہ اعزاز اس بات کی عکاسی کرتا ہے کہ مملکت نے جدید اور پائیدار ٹرانسپورٹ سسٹم کی تعمیر میں نہایت تیز پیش رفت کی ہے۔دسمبر 2024 میں افتتاح ہونے والا ریاض میٹرو 6 لائنوں پر مشتمل ہے، جس میں 85 اسٹیشنز شامل ہیں اور اس کی کل لمبائی 176 کلومیٹر بنتی ہے۔ یہ وسیع نیٹ ورک شہر میں ٹریفک کے دباؤ کو کم کرنے کے لیے کلیدی کردار ادا کرے گا۔ پورا نظام جدید ٹیکنالوجی کے تحت بغیر ڈرائیور چلتا ہے اور تمام آپریشنز جدید کمانڈ سینٹرز سے کنٹرول کیے جاتے ہیں۔

رپورٹ میں مزید کہا گیا کہ یہ کامیابی ریاض سٹی کے رائل کمیشن کی اس جدید سوچ کی علامت ہے جس کے تحت اسمارٹ اور ماحول دوست شہری ٹرانسپورٹ کو فروغ دیا جا رہا ہے، جدید انفراسٹرکچر قائم کیا جا رہا ہے اور شہریوں کے معیارِ زندگی کو بہتر بنانے کی کوشش کی جا رہی ہے۔یہ تمام اقدامات سعودی وژن 2030 کے اہداف کے مطابق ہیں، جس کا مقصد تیل کے علاوہ دیگر شعبوں کو مضبوط بنانا اور ملک کو جدید ترین سہولیات سے آراستہ کرنا ہے۔