اسلام آباد(این این آئی)آئل اینڈ گیس ریگولیٹری اتھارٹی (اوگرا)نے رواں مالی کیلئے گیس قیمتوں میں کمی کی منظوری دے دی۔اوگرا نے سوئی ناردرن اور سوئی سدرن کی اوسط قیمتوں میں کمی سے متعلقہ فیصلہ وفاقی حکومت کو بجھوادیا ہے۔ترجمان اوگرا کے مطابق سوئی نادرن کیلئے گیس کی اوسط قیمت میں 3فیصد اور سدرن کی قیمت میں 8فیصد کی کمی تجویز کی گئی ہے۔

اوگرا ترجمان کے مطابق سوئی ناردرن کیلئے کمی کے بعد گیس کی قیمت 1804روپے 8پیسے اور سوئی سدرن کیلئے اوسط قیمت 1549روپے 41پیسے فی ایم ایم بی ٹی یو تجویز کی گئی ہے۔ترجمان اوگرا کے مطابق وفاقی حکومت سے ایڈوائس آنے کے بعد اوگرا گیس قیمتوں سے متعلق نوٹیفکیشن جاری کر ے گی۔اوگرا ترجمان کے مطابق وفاقی حکومت سلیب کے حساب سے گیس کی نئی قیمتوں پر ایڈوائس مانگی گئی ہے۔ذرائع اوگرا کے مطابق وفاقی حکومت کی طرف سے منظوری ہونے کی صورت میں صارفین کو فائدہ منتقل ہوگا، وفاقی حکومت 40روز میں اوگرا کو جواب دینے کی پابند ہے بصورت دیگر فیصلہ خود بخود لاگو ہو جائے گا۔