اسلام آباد (این این آئی)چینی حکومت کے اسکالرشپ پروگرام 27ـ2026 کے لیے پاکستانی طلبہ سے درخواستیں طلب کر لی گئی ہیں، جس کے تحت 75 مکمل مالی معاونت والی اسکالرشپس فراہم کی جائیں گی تاکہ پاکستانی طلبا چین کی نمایاں یونیورسٹیوں میں اعلیٰ تعلیم حاصل کر سکیں۔گوادر پرو کے مطابق اسکالرشپ میں 35 بیچلر، 25 ماسٹرز اور 15 پی ایچ ڈی پروگرامز کے لیے مختص ہیں۔

یہ اقدام، جو چینی اسکالرشپ کونسل (سی ایس سی) کے زیر انتظام ہے، چین اور پاکستان کے درمیان تعلیمی تعاون اور عوامی روابط کو مضبوط بنانے کے لیے کیا گیا ہے۔گوادر پرو کے مطابق ایچ ای سی جو نامزد کرنے والا ادارہ ہے، نے اپنی آن لائن اسکالرشپ پورٹل کے ذریعے درخواست دینے کی آخری تاریخ 5 جنوری 2026 مقرر کی ہے۔ کمیشن نے واضح کیا ہے کہ وہ صرف ٹائپـاے (ایچ ای سی–چینی حکومت اسکالرشپ) کے تحت نامزدگی کے لیے ذمہ دار ہے، جبکہ وہ درخواست دہندگان جو براہِ راست چینی یونیورسٹیوں میں ٹائپـبی یا دیگر زمروں کے تحت درخواست دے رہے ہیں، اپنی درخواست اور رابطہ کاری خود سنبھالیں گے۔

گوادر پرو کے مطابق انڈرگریجویٹ امیدواروں کے لیے ایک نیا تقاضا ہے کہ وہ چائنا اسکولیستک کمپٹینسی اسیسمنٹ (CSCA) www.csca.cn[(http://www.csca.cn) پر مکمل کریں، جو ہر درخواست دہندہ کے لیے لازمی ہے چاہے وہ کسی بھی قسم کی درخواست دے رہا ہو۔گوادر پرو کے مطابق چین کی وزارتِ تعلیم کے تحت، سی ایس سی اس پروگرام کا انتظام کرتی ہے، جس میں اب 289 چینی یونیورسٹیاں شامل ہیں جو سائنس اور انجینئرنگ سے لے کر ہیومینٹیز، قانون اور فنونِ لطیفہ تک مختلف مضامین پیش کرتی ہیں۔