اسلام آباد (نیوز ڈ یسک ) مصر کے علاقے شبرا الخیمہ میں پیش آنے والے ایک دلخراش واقعے میں موبائل فون کے چارجر کے شارٹ سرکٹ نے پورے خاندان کی زندگی اجاڑ دی۔ افسوسناک واقعہ بیجام نامی علاقے میں پیش آیا جہاں ایک اپارٹمنٹ میں اچانک آگ بھڑک اٹھی اور دیکھتے ہی دیکھتے پورا گھر لپیٹ میں آ گیا۔تفصیلات کے مطابق جمعرات کی صبح باورچی خانے سے لگنے والی آگ نے چند ہی لمحوں میں شدت اختیار کرلی، جس کے نتیجے میں ایک ماں، اس کی بہن اور چار کمسن بچے جاں بحق ہوگئے۔پڑوسیوں نے آگ لگنے کی اطلاع فوری طور پر سول ڈیفنس اور سکیورٹی حکام کو دی، جنہوں نے موقع پر پہنچ کر طویل جدوجہد کے بعد آگ پر قابو پایا، تاہم اس وقت تک تمام افراد دم توڑ چکے تھے۔
تحقیقات کے ابتدائی مرحلے میں پتہ چلا ہے کہ حادثے کی وجہ موبائل فون کے چارجر کا شارٹ سرکٹ تھا، جس نے باورچی خانے میں آگ بھڑکائی۔عینی شاہدین کے مطابق صبح تقریباً سات بجے اچانک بچوں کی چیخیں سنائی دیں۔ اہلِ محلہ پانی اور آگ بجھانے کے آلات لے کر مدد کے لیے پہنچے، مگر شعلے اس قدر تیز تھے کہ کوئی اندر داخل نہ ہو سکا۔اطلاعات کے مطابق اپارٹمنٹ کے لوہے کے گیٹ نے بھی ریسکیو کارروائی میں رکاوٹ ڈالی، جس کے باعث قیمتی جانیں ضائع ہو گئیں۔ ایک عینی شاہد نے بتایا کہ اندر ایک خصوصی ضرورتوں والا بچہ بھی موجود تھا جو دھوئیں کے باعث دم گھٹنے سے جاں بحق ہوا۔مقامی میڈیا کا کہنا ہے کہ تمام اموات دھوئیں کے باعث دم گھٹنے اور آگ کی شدت سے ہوئیں، جبکہ حکام نے تصدیق کی ہے کہ بجلی کا شارٹ سرکٹ اور حفاظتی اقدامات کی کمی اس سانحے کی بنیادی وجوہات ہیں۔
