لاہور( این این آئی)فیڈرل بورڈ آف ریونیو نے مینول طریقے سے انکم ٹیکس گوشوارے جمع کرانے والوں کیلئے ریٹرن فائل کرنے کی تاریخ میں 30نومبر تک توسیع کر دی ، ٹیکس دہندگان کو سہولت دینے کیلئے ملک بھر کے ٹیکس دفاتر میں خصوصی سیل بھی قائم کر دیئے گئے، مقصد مستقبل میں آن لائن ریٹرن فائل کرنے والوں کی حوصلہ افزائی کرنا ہے۔ ایف بی آر نے آن لائن ریٹرن فائلنگ کے فروغ کے لیے مینول انکم ٹیکس فائلرز کے لیے خصوصی سہولیات کا اعلان کر دیا۔ ایف بی آر نے پاکستان بھر میں ٹیکس نظام کی مکمل ڈیجیٹلائزیشن کے جاری عمل کے تحت مینول انکم ٹیکس فائلرز کے لیے خصوصی اقدامات کا اعلان کیا ہے۔

آن لائن فائلنگ سسٹم میں آسانی سے منتقلی کو یقینی بنانے کے لئے ایف بی آر نے ٹیکس سال 2024سے مینول ریٹرن فائلنگ کو ختم کر دیا ہے تاہم ایف بی آر نے مینول ریٹرن جمع کرانے والے ٹیکس فائلرز کو آن لائن نظام سے ہم آہنگ ہونے میں درپیش دشواری کو مد نظر رکھتے ہوئے انہیں خصوصی سہولیات فراہم کرنے کا فیصلہ کیا ہے۔ اس مقصد کے فروغ کے لیے تمام ٹیکس دفاتر میں خصوصی سیل مینول ریٹرن فائل کر نے والے ٹیکس دہندگان کو تمام ضروری قانونی اور تکنیکی معاونت فراہم کرے گا ۔ مینول ٹیکس فائلرز کے لیے ریٹرن فائلنگ کی آخری تاریخ میں 30نومبر تک توسیع بھی کر دی گئی۔