اسلام آباد(نیوز ڈیسک) چیئرمین ایئر کراچی اور معروف صنعتکار حنیف گوہر نے انکشاف کیا ہے کہ تربیلا ڈیم کی مٹی میں تقریباً 636 ارب ڈالر مالیت کے سونے کے ذخائر موجود ہیں۔ ان کے مطابق اس حوالے سے وزیراعظم اور آرمی چیف جنرل عاصم منیر کو تفصیلی بریفنگ دی جاچکی ہے، اور آرمی چیف نے اس دریافت پر فوری طور پر مثبت ردعمل ظاہر کیا ہے۔ایکسپریس نیوز کے مطابق کراچی پریس کلب میں میڈیا سے گفتگو کرتے ہوئے حنیف گوہر نے بتایا کہ ان کی ٹیم نے تربیلا ڈیم سے غوطہ خوروں کے ذریعے مٹی کے نمونے حاصل کیے، جنہیں بعد ازاں مختلف لیبارٹریز میں ٹیسٹ کیا گیا۔ ٹیسٹ رپورٹس سے پتہ چلا کہ مٹی میں سونے کی نمایاں مقدار پائی جاتی ہے۔انہوں نے بتایا کہ حاصل کردہ تناسب کو ڈیم کے متاثرہ حصے کی مجموعی مٹی کے حجم سے ضرب دینے کے بعد تقریباً 636 ارب ڈالر مالیت کے سونے کا تخمینہ لگایا گیا۔
حنیف گوہر کے مطابق یہ تمام تفصیلات انہوں نے وزیراعظم اور آرمی چیف کو پیش کیں، جس کے بعد آرمی چیف نے اس معاملے کو ایس آئی ایف سی کے سربراہ جنرل سرفراز کے سپرد کر دیا۔ بعد ازاں انہوں نے جی ایچ کیو میں بھی ایک باضابطہ پریزنٹیشن دی، جس کے بعد یہ کیس چیئرمین واپڈا سجاد غنی کے حوالے کیا گیا۔حنیف گوہر نے بتایا کہ چیئرمین واپڈا سے ملاقات کے دوران انہوں نے پیشکش کی کہ اگر حکومت چاہے تو یہ منصوبہ سرکاری طور پر مکمل کر سکتی ہے، لیکن اگر ایسا ممکن نہ ہو تو ان کی کمپنی اپنی لاگت پر مٹی نکالنے اور سونا الگ کرنے کا کام کرے گی۔ ان کا کہنا تھا کہ اس منصوبے سے حاصل ہونے والا تمام سونا ریاست پاکستان کے حوالے کر دیا جائے گا۔انہوں نے مزید کہا کہ اب وہ حکومت کے حتمی فیصلے اور باضابطہ جواب کے منتظر ہیں تاکہ آئندہ کے لائحہ عمل کا تعین کیا جا سکے۔
