پشاور (این این آئی)خیبر پختونخوا میں سیلاب سے سرکاری نقصانات کی ابتدائی رپورٹ تیار کرلی گئی ہے۔ پشاور سے جاری رپورٹ کے مطابق بارشوں کے باعث 20 ارب روپے سے زیادہ کا مالی نقصان ہوا، 20 محکموں کی 603 سرکاری املاک کو نقصان پہنچا۔ رپورٹ میں کہا گیا کہ بٹگرام میں سب سے زیادہ 214 سرکاری املاک تباہ ہوئیں، سوات میں97، باجوڑ 65 اور مانسہرہ میں 58 سرکاری عمارتیں متاثر ہوئیں۔

رپورٹ کے مطابق 37 سرکاری تعلیمی ادارے، 83 سڑکیں اور 10 پل مکمل تباہ ہوئے، 226 ایرگیشن چینلز، 68 واٹر سپلائی اسکیمیں متاثر ہوئیں، محکمہ آبپاشی کو 10 ارب، 32 کروڑ اور 80 لاکھ روپے سے زیادہ کا نقصان ہوا۔سی اینڈ ڈبلیو کو 3 ارب، 43 کروڑ اور 80 لاکھ روپیکا نقصان پہنچا، محکمہ تعلیم کو ایک ارب، 44 کروڑ اور 90 لاکھ روپے، پبلک ہیلتھ انجینئرنگ کو 21 کروڑ 70 لاکھ روپے کا نقصان پہنچا۔ ذرائع کے مطابق رپورٹ وزیراعلیٰ خیبر پختونخوا کو ارسال کر دی گئی ہے۔