اسلام آباد (نیوز ڈیسک) لاہور میں مقیم ایک چینی باشندے کے گھر چوری کی واردات کے بعد پولیس نے کارروائی کرتے ہوئے چوروں کو گرفتار کیا اور بھاری رقم برآمد کی، مگر بعد میں انکشاف ہوا کہ پوری رقم متاثرہ شہری کو واپس نہیں کی گئی۔ذرائع کے مطابق تفتیش کے دوران پتہ چلا کہ تھانہ ڈیفنس کے ایس ایچ او علی حسن اور اس کی ٹیم نے برآمد شدہ 1 کروڑ 80 لاکھ روپے میں سے صرف 1 کروڑ 20 لاکھ روپے ہی چینی شہری کے حوالے کیے، جب کہ باقی 60 لاکھ روپے کا کوئی سراغ نہ مل سکا۔
متاثرہ فرد کی جانب سے شکایت سامنے آنے کے بعد ایس ایس پی ڈیفنس بانو نقوی نے فوری نوٹس لیتے ہوئے سات پولیس اہلکاروں کو معطل کر دیا اور ان کے خلاف محکمانہ رپورٹ مرتب کروا دی۔ رپورٹ کے مطابق متاثرہ شخص نے پولیس پر عدم اعتماد اور تفتیش کے غیر شفاف عمل پر اعتراض اٹھایا، جس کے بعد اندرونی تحقیقات کا آغاز کیا گیا۔انکوائری میں یہ بات سامنے آئی کہ متعلقہ اہلکاروں نے ملی بھگت سے رقم میں خرد برد کی، جس پر ان کے خلاف ضابطے کے تحت کارروائی کی جا رہی ہے۔ پولیس حکام کا کہنا ہے کہ قانون کی خلاف ورزی پر کسی کو بھی رعایت نہیں دی جائے گی۔
