اسلام آباد (نیوز ڈیسک)پنجاب میں جاری مون سون بارشوں نے صورتحال کو نہایت سنگین بنا دیا ہے، جہاں مختلف علاقوں میں ندی نالے طغیانی کا منظر پیش کر رہے ہیں۔ راولپنڈی کی ایک نجی ہاؤسنگ سوسائٹی میں پیش آنے والے افسوسناک حادثے نے سب کو افسردہ کر دیا۔منگل کے روز شہر میں موسلادھار بارش کے دوران فیز 5 کے علاقے میں ایک گاڑی برساتی نالے کے قریب سے گزرنے کی کوشش کے دوران پانی کے تیز بہاؤ میں بہہ گئی۔
اطلاعات کے مطابق گاڑی میں سوار ریٹائرڈ کرنل اسحاق قاضی اور ان کی 25 سالہ بیٹی موجود تھے۔عینی شاہدین کے مطابق، گاڑی پانی میں پھنس گئی تھی اور اسحاق قاضی اسے دوبارہ اسٹارٹ کرنے کی کوشش کر رہے تھے، مگر پانی کی شدت نے گاڑی کو بہا لیا۔ گاڑی میں سوار دونوں افراد مدد کے لیے پکار رہے تھے، لیکن لمحوں میں وہ پانی میں غائب ہو گئے۔واقعے کی اطلاع ملتے ہی ریسکیو 1122، مقامی پولیس، سوسائٹی کا عملہ اور غوطہ خوروں کی ٹیم موقع پر پہنچ گئی اور دونوں کی تلاش کے لیے فوری آپریشن شروع کر دیا گیا۔ریسکیو ذرائع کے مطابق، نالے میں پانی کا بہاؤ اتنا شدید تھا کہ گاڑی کا قابو پانا ممکن نہ رہا۔
تلاش کا عمل بدستور جاری ہے، تاہم واقعے کی ویڈیوز سوشل میڈیا پر وائرل ہو چکی ہیں، جن میں باپ بیٹی کی بے بسی دیکھ کر شہریوں میں غم و غصہ پایا جا رہا ہے۔متاثرہ خاندان اور شہریوں نے مطالبہ کیا ہے کہ بارش کے دوران سڑکوں اور برساتی نالوں کی نگرانی سخت کی جائے تاکہ مستقبل میں ایسے واقعات سے بچا جا سکے۔
