پاکپتن (این این آئی)سابق خاتونِ اوّل بشریٰ بی بی اور خاور مانیکا کے بیٹے موسیٰ مانیکا کے خلاف پاکپتن میں اقدامِ قتل کا مقدمہ درج کر لیا گیا۔پولیس کے مطابق مقدمہ زخمی نوجوان علی بہادر کے والد منظور احمد کی مدعیت میں درج کیا گیا ہے۔پولیس نے بتایا کہ باپ بیٹا دونوں خاور مانیکا کے گھر ملازم ہیں۔
زخمی نوجوان علی بہادر کے والد نے ایف آئی آر میں الزام عائد کیا کہ بیٹے کے ہاتھ بیڈ کی چادر سے لگے تو ملزم موسیٰ نے فائرنگ کر دی۔پولیس کے مطابق ملزم موسیٰ مانیکا پولیس کی حراست میں ہے اس حوالے سے ڈی پی او پاکپتن نے بتایا کہ ملزم موسیٰ مانیکا کو گرفتار کر کے اسلحہ برآمد کر لیا ہے۔ڈی پی او پاکپتن کے مطابق ملزم موسیٰ مانیکا نے کہا ہے کہ اس نے کام میں غفلت برتنے پر ملازم کو فائرنگ کر کے زخمی کیا۔پولیس کے مطابق موسیٰ مانیکا کی فائرنگ سے زخمی ہونے والے ملازم کی حالت خطرے سے باہر ہے۔
