کراچی(این این آئی)کراچی کے علاقے اورنگی ٹائون میں داماد نے اپنے والد اور رشتہ داروں سے مل کر فائرنگ کرکے سسر سمیت تین افراد کو قتل کردیا۔پولیس حکام کے مطابق اورنگی ٹائون کے علاقے مومن آباد چوک میں خاندانی جھگڑے کے دوران داماد نے فائرنگ کرکے اپنے سسر سمیت 3 افراد کو قتل کردیا۔ایس ایس پی ویسٹ طارق مستوئی کے مطابق واقعہ اس وقت پیش آیا جب مقتول غوث الدین عرف عمران اپنے رشتے داروں کے ہمراہ اپنی بیٹی کے گھر آیا تھا۔

گھر میں خاندانی جھگڑے کے دوران عمران کے داماد حمید، بھائی رحمت، والد شاہجہان اور رشتے دار رحمت نے فائرنگ کر دی جس کے نتیجے میں عمران، گل بخت خان اور امین شدید زخمی ہوکر موقع پر ہی دم توڑ گئے۔پولیس نے جائے وقوعہ پر پہنچ کر بروقت کارروائی کرتے ہوئے مقتول عمران کی بیٹی کے سسر شاہجہان اور رشتہ دار ملزم رحمت کو گرفتار کر لیا جبکہ مقتول غوث الدین عرف عمران کا داماد حمید اور اس کا بھائی رحمت موقع سے فرار ہونے میں کامیاب ہو گئے۔پولیس حکام کے مطابق سسر کو قتل کرنے والے داماد کی تلاش کے لیے چھاپے مارے جا رہے ہیں۔ جائے وقوعہ سے نائن ایم ایم پستول اور دیگر اسلحہ پولیس نے تحویل میں لے لیا ہے، مزید شواہد اکھٹے کیے جارہے ہیں۔