اسلام آباد (نیوز ڈیسک)کچے کا مبینہ ڈاکو خریداری کیلئے سکھر آنے پر پکڑا گیا۔پولیس کے مطابق 3 سال قبل اغوا کیے گئے شہری نے پہچان کر دھرلیا، کچے میں کئی ماہ یرغمال رہنے والے سکھر کے شہری نے ڈاکو کو موبائل مارکیٹ میں گھومتے ہوئے پہچانا۔شہری نے ساتھیوں کی مدد سے کچے کے ڈاکو کی پٹائی کرنے کے بعد پولیس کے حوالے کردیا۔

پولیس کے مطابق کچے کا ڈاکو خاتون اور ایک ساتھی کے ساتھ سم خریدنے سکھر کی موبائل مارکیٹ پہنچا تھا۔سکھر پولیس کا کہنا ہے کہ تینوں ملزمان کو حراست میں لے کر تفتیش کی جارہی ہے۔دوسری جانب کچے کے ڈاکو کو پہچان کر پکڑنے والے شہری نے جیو نیوز کو بتایا ہے کہ تین سال پہلے اسی ڈاکو نے خاتون کی آواز میں بات کرنے کے بعد بلا کر اغوا کیا تھا، ڈاکوؤں نے کئی ہفتے تک تشدد کرنے اور بیس لاکھ روپے تاوان لینے کے بعد چھوڑا تھا۔