اسلام آباد (نیوز ڈیسک)اکستان نے بھارت کو واضح پیغام دیتے ہوئے خبردار کیا ہے کہ اگر اُس کی جانب سے کوئی جارحانہ اقدام کیا گیا تو پاکستان مکمل قوت کے ساتھ دفاع کرے گا، چاہے وہ روایتی طاقت ہو یا جوہری صلاحیت۔
ذرائع کا کہنا ہے کہ حالیہ پہلگام واقعے کو بنیاد بنا کر بھارت نے بغیر کسی مستند ثبوت کے پاکستان پر الزام تراشی کی، جسے پاکستان نے ٹھوس شواہد کے ذریعے مسترد کر دیا ہے۔ بھارتی الزامات کے باعث نہ صرف اس کی ساکھ عالمی سطح پر متاثر ہوئی ہے بلکہ اس کا پروپیگنڈا بھی بے نقاب ہو چکا ہے۔
پاکستان میں تعینات سفیر محمد خالد جمالی نے ایک بیان میں خبردار کیا کہ اگر بھارت نے کسی قسم کی عسکری کارروائی کی تو پاکستان اس کا بھرپور جواب دے گا۔ انہوں نے کہا کہ بھارت کی طرف سے ممکنہ حملے کی منصوبہ بندی کے بارے میں انٹیلی جنس اطلاعات موصول ہوئی ہیں، اور بھارت پہلے بھی فالس فلیگ آپریشنز کے ذریعے پاکستان پر الزامات عائد کرتا رہا ہے۔
خالد جمالی نے اس بات پر زور دیا کہ پاکستان کسی بھی قسم کی دراندازی یا جارحیت کو برداشت نہیں کرے گا، خصوصاً پانی جیسے حساس معاملے پر کوئی بھی حملہ، خطے میں کشیدگی کو جنگ میں تبدیل کر سکتا ہے۔ اُن کا کہنا تھا کہ پاکستان اپنے دفاع کے لیے ہر ممکن حد تک جائے گا۔
انہوں نے عالمی برادری سے اپیل کی کہ پہلگام واقعے کی غیر جانبدار اور شفاف تحقیقات کی جائیں تاکہ حقائق سامنے آ سکیں۔ پاکستان نے چین اور روس سے اس معاملے میں ثالثی اور تحقیقات میں شامل ہونے کی درخواست کی ہے۔ پاکستانی سفیر نے بھارتی الزامات کو بے بنیاد قرار دیتے ہوئے کہا کہ ہمیں اپنی سرزمین کے دفاع کا پورا حق حاصل ہے، اور ہم کسی قسم کے جنگی پروپیگنڈے کو تسلیم نہیں کرتے۔
