لاہور( این این آئی)عیدالفطر کے بعد اب عیدالاضحی 2025 کے حوالے سے فلکیاتی ماہرین نے پیشگوئیاں شروع کردیں۔متحدہ عرب امارات میں ایمریٹس آسٹرونومی سوسائٹی کے مطابق عیدالاضحی جمعہ 6جون 2025کو ہونے کا امکان ہے۔

ماہرین کے مطابق ذی الحج کا چاند 27مئی کو نظر آنے کی توقع ہے، جس کے بعد 28مئی کو ذی الحج کا پہلا دن ہوگا، چاند صبح 7:02بجے طلوع ہوگا اور سورج غروب ہونے کے بعد 38منٹ تک آسمان پر موجود رہے گا، جو چاند دیکھنے کے امکانات کو بڑھاتا ہے۔ایمریٹس آسٹرونومی سوسائٹی کے چیئرمین ابراہیم الجروان نے وضاحت کی کہ عید کی حتمی تاریخ مقامی چاند کی رویت پر ہی طے ہوگی۔سرکاری تعطیلات کے مطابق 9 سے 12ذی الحج1445ھ تک 4روزہ عید کی چھٹیوں کا اعلان کیا جائے گا جو متوقع طور پر 5جون سے 8جون تک ہوں گی۔دوسری جانب پاکستان میں فلکیاتی ماہرین کا کہنا ہے کہ عیدالاضحی ہفتہ 7جون 2025 کو ہونے کا امکان ہے تاہم حتمی اعلان مرکزی رویت ہلال کمیٹی چاند دیکھنے کے بعد کرے گی۔