اسلام آباد (نیوز ڈیسک) سابق وزیراعظم اور مسلم لیگ (ن) کے صدر نواز شریف کے صاحبزادے حسن نواز کو برطانیہ میں 5.2 ملین پاؤنڈ کا ٹیکس جرمانہ کر دیا گیا۔ نجی ٹی وی جیو نیوز کے مطابق، برطانوی حکومت کی تازہ فہرست میں حسن نواز کو “ٹیکس ڈیفالٹر” قرار دے دیا گیا ہے۔

رپورٹس کے مطابق، حسن نواز نے 5 اپریل 2015 سے 6 اپریل 2016 کے دوران تقریباً 9.4 ملین پاؤنڈ کا ٹیکس ادا نہیں کیا، جس کے بعد برطانوی ٹیکس اتھارٹی نے ان پر 5.2 ملین پاؤنڈ کا جرمانہ عائد کر دیا ہے۔

قانونی ماہرین کا کہنا ہے کہ دیوالیہ ہونے کے باوجود حسن نواز سے یہ رقم وصول کیے جانے کا امکان موجود ہے، کیونکہ برطانوی قوانین کے مطابق ٹیکس چوری کے جرمانے دیوالیہ ہونے پر بھی معاف نہیں کیے جاتے۔ برطانوی حکومت نے حسن نواز کے خلاف یہ تفصیلات سرکاری ویب سائٹ پر جاری کر دی ہیں۔