دبئی (این این آئی)بھارتی ٹیم کے لیے ایک اور برُی خبر ہے کہ ان کے اہم بولر محمد شامی انجری خدشات کے باعث چیمپئنز ٹرافی کے سیمی فائنل سے باہر ہو سکتے ہیں۔انڈین میڈیا کے مطابق دو دن کے وقفے کے بعد بھارتی ٹیم نے نیوزی لینڈ کے خلاف چیمپئنز ٹرافی کے مقابلے کی تیاری دوبارہ شروع کر دی ہے۔تاہم ایک بڑی تشویش سامنے آئی ہے کہ محمد شامی نیٹ باؤلنگ سیشن اور فیلڈنگ پریکٹس دونوں سے غیرحاضر تھے۔بھارتی میڈیا نے اپنے ذرائع کے حوالے سے بتایا ہے کہ شامی کے نیوزی لینڈ کے خلاف کھیلنے کا امکان نہیں ہے اور یہ قیاس آرائیاں بھی کی جا رہی ہیں کہ وہ پورے ٹورنامنٹ سے باہر ہو سکتے ہیں۔
بنیادی تشویش یہ ہے کہ آیا انہیں ٹانگ کی معمولی چوٹ کا سامنا ہے یا گھٹنے کے مسائل دوبارہ سامنے آئے ہیں۔ شامی کو پریکٹس کے دوران دونوں گھٹنوں میں پٹے کے ساتھ دیکھا گیا جو ان کی دستیابی کے لیے کوئی امید افزا علامت نہیں ہے۔شامی کی دشواری پاکستان کے خلاف میچ کے دوران واضح تھی جہاں وہ گیند پر کنٹرول کرنے میں مشکلات سے دوچار تھے اور انہوں نے اپنے پہلے اوور میں پانچ وائیڈ بولڈ کیے تھے پھر تھوڑی دیر بعد وہ میدان سے باہر چلے گئے، جس سے ان کی فٹنس کے بارے میں مزید خدشات بڑھ گئے۔
