اوکاڑہ(نیوزڈیسک)قومی اسمبلی کے حلقہ این اے 144اوکاڑ ہ میں ہونے والے ضمنی انتخاب کا میدان سج گیا۔ مقابلہ 5امیدواروں کے درمیان 210پولنگ اسٹیشنز پر ہوگا۔ این اے 144میں مقابلہ 5امیدواروں پاکستان مسلم لیگ ن کے علی عارف، پی ٹی آئی کے محمد اشرف سوہنا ،پیپلزپارٹی کے چودھری سجاد الحسن ، آزاد امیدوار عبدالستار اور آزاد امیدوار چودھری ریاض الحق جج کے درمیان کے ہوگا۔ تاہم کانٹے دار مقابلہ ن لیگ کے علی عارف اور آزاد امیدوار چودھری ریاض الحق جج کے درمیان متوقع ہے۔ انتخابی معرکے کے تمام انتظامات مکمل کرلیے گئے ہیں۔ این اے 144میں کل رجسٹرڈ ووٹرز کی تعداد 3لاکھ 61ہزار 370ہے جن میں مرد ووٹرز 1لاکھ 73ہزار991اور خواتین ووٹرز 1لاکھ 42ہزار 419ہیں۔ انتخابی عمل کے لیے 590پولنگ بوتھ قائم کیے گئے ہیں جن پر 1500الیکشن اہلکار فرائض سرانجام دینگے۔ انتخابی حلقے میں بیلٹ پیپرز، بیلٹ باکسز ، مقاطیسی سیاہی اور پیڈز وغیر ہ کی ترسیل فوج اور پولیس کی نگرانی میں مکمل کرلی گئی ہے۔اکیس یونین کونسلز اور 80دیہات پر مشتمل حلقہ این اے 144میں کل ہونے والے مقابلے کے لیے امیدوار تیار اور ووٹرز بے قرار ہیں ۔ کامیابی کس کے قدم چومے گی یہ فیصلہ کل 5بجے کے بعد ہوجائے گا۔