لاہور(نیوزڈیسک)لاہور کے علاقے سمن آباد کی ڈونگی گراؤنڈ میں انتخابی جلسے سے خطاب کرتے ہوئے ن لیگی رہنماؤں نے تحریک انصاف پر لفظوں کے نشتر چلائے، وفاقی وزیر ریلوے خواجہ سعد رفیق نے چئیرمین تحریک انصاف کو انٹرنیشنل آوارہ گرد کا نیا خطاب دیا،ان کاکہنا تھا کہ لاہور کے شیر جب جاگتے ہیں تو کوئی طوفان ان کا مقابلہ نہیں کر سکتا، لاہور پر پھر امتحان آن پڑا ہے، لاہوریے نواز شریف پر فدا ہیں، لاہور کے شیر اور شیرنیوں نے این اے ایک سو بائیس کا میدان مارنا ہے، انہوں نے کہا کہ لاہوریوں کے فیصلوں سے حکومت بنتی ہے، ان کا کہنا تھا کہ تحریک انصاف گالیاں دیتی ہے، لیکن ہم نے ن لیگ کے ووٹروں کا سر جھکنے نہیں دیا، شیخ رشید کی طرح گندی زبان استعمال نہیں کی، عمران خان ملک میں ترقی نہیں چاہتے،عمران خان ضدی بچہ نہ بنیں،ووٹ جھوٹ بولنے سے نہیں ملتا، اس سے قبل اپنے خطاب میں سردار ایاز صادق کا کہنا تھا کہ عمران خان نےحلقےمیں آکراعتراف کیا کہ ان کالنگڑاگھوڑاریس نہیں جیت سکتا، عمران خان کو دوہزار تیرہ میں نواز شریف کے چھوٹے کارکن نے ہرایا۔عمران خان انا پرست ہیں اس لئے وزیر اعظم نہیں بن سکتے۔ تحریک انصاف نے دھرنے سے اسمبلیوں پر یلغار کی اور پارلیمنٹ کے تقدس کو پامال کیا، عمران خان پہلے اسمبلی کو جعلی کہتے تھے آج ووٹ مانگ رہے ہیں۔عمران خان کے دُہرے معیار کب تک چلیں گے؟ پاکستان کے عوام اب عمران خان کے جھوٹے جھانسوں میں نہیں آئیں گے۔ سردار ایاز صادق کا کہنا تھا کہ اگر لوگ ملک میں خوشحالی، دہشت گردی کا خاتمہ سرمایہ کاری اور روزگار چاہتے ہیں تو گیارہ اکتوبر کو شیر پر مہر لگائیں اور ن لیگ کو کامیاب کرائیں۔