اسلام آباد (این این آئی)مسلم لیگ (ن)کے رہنماء حنیف عباسی نے کہا ہے کہ پوری قوم کرکٹ ٹیم سفارشی ہے،کرکٹرز نے قوم کو مایوس کیا ان کے اشتہار بند کرنے چاہئیں،بابراعظم ذاتی طور پر کھیلتا ہے ،ایک بھی میچ وننگ اننگز نہیں کھیلی۔نجی ٹی وی سے گفتگو کرتے ہوئے لیگی رہنماء حنیف عباسی نے کہا کہ پوری قومی کرکٹ ٹیم سفارشی ہے، یہ پہلے امریکا سے بھی ہارچکی ہے، انہوں نے کہا کہ ہمیشہ پروفیشنل کی بجائے اپنی مرضی کا بندہ کرکٹ کیلئے لگایا جاتاہے، انہوں نے کہا کہ ٹیم کی سلیکشن کرنے والوں کو پکڑا جائے،کرکٹرز نے قوم کو مایوس کیا ان کے اشتہار بھی بند کرنے چاہئیں۔
انہوں نے کہا کہ بابر اعظم کو ویرات کوہلی کے برابر کر دیا گیا ہے، ویرات کوہلی کی بہت ساری میچ وننگ اننگز ہیں۔ انہوں نے کہا کہ بابراعظم ذاتی طور پر کھیلتا ہے اور اپنی اننگز کو بڑا کرتا ہے،بابراعظم نے ایک بھی میچ وننگ اننگز نہیں کھیلی۔ انہوںنے کہا کہ ٹیم میں کسی ایک پلیئر پر بھی اعتماد نہیں کر سکتا، شاداب خان، عماد وسیم جیسے پلیئرز نے تو کلب کرکٹ سے بھی کم کھیلا ہے، اگر کھلاڑیوں سے کرکٹ کھلانی ہے تو ان کی ماڈلنگ ختم کرنی ہو گی،اگر ماڈلنگ کرنی ہے تو کرکٹ میں رزلٹ بھی تو دیں۔
