ہرارے(نیوز ڈیسک) زمبابوے میں لنگوروں کے ایک گروہ نے ٹرانسمشن ٹاور پر دھاوا بولتے ہوئے تار چبا ڈالے جس کے باعث ایک ریڈیو سٹیشن کی نشریات عارضی طور پر معطل ہو گئیں۔ رپورٹ میں مقامی اخبار کے حوالے سے بتایا گیا ہے کہ حال ہی میں اپنی نشریات کا آغاز کرنے والے وائی اے ایف ایم کی صبح کی نشریات اچانک بند ہو گئیں جس پر تکنیکی عملے کو ہنگامی طور پر اس کی وجہ معلوم کرنے کیلئے بھیجا گیا۔ وائی اے ایف ایم کے چیف ایگزیکٹو منیارازدی ہیونگویری کا کہنا ہے کہ ابتدا میں ہم نے سمجھا کہ بجلی کی بندش کے باعث ایسا ہوا ہے مگر بعد میں معلوم ہوا کہ بجلی تو آر ہی ہے، تبھی تیکنیکی عملے نے انکشاف کیا کہ ایک پہاڑی مقام پر ہمارے ٹرانسمشن ٹاور کو لنگوروں نے نشانہ بنایا ہے اور پانچ سے زیادہ لنگوروں نے تاروں کو کاٹ کھایا۔ بعد میں کیبل کی مرمت کے بعد نشریات بحال کر دی گئیں تاہم ایک گھنٹے کی بندش کے باعث اشتہارات کی مد میں نقصان اسے برداشت کرنا پڑا ہے۔