اسلام آباد (این این آئی)شہدائے پاک فوج کے اہل خانہ نے ملک کے موجودہ حالات کے تناظرمیں پیغام جاری کرتے ہوئے کہاہے کہ ہر پاکستانی خون کے آنسو رو رہا ہے۔کیپٹن سلمان سرور شہید کے والد نے کہا کہ ہر پاکستانی خون کے آنسو رو رہا ہے، شہداء کے خاندان ایک دوسرے سے مل کر رو رہے ہیں، ہم نے کس کیلئے اپنے بچوں کو قربان کیاہے؟ یہ سب جس نے بھی کیا ہے اْسے چھوڑنا نہیں چاہیے۔
کیپٹن بلال سلیم شہید کی والدہ نے کہا کہ جس وقت یہ حملہ ہوا تو دل خون کے آنسو رو رہا تھا، انہوں نے کیسے جرات کی ہماری خوبصورت یادگار کو جلانے کی، اللہ خود ہی ان کو عبرتناک سزا دے گا۔کیپٹن کاشان نویدشہید کی والدہ نے کہا کہ ہمارے بچے قربانیاں دے کر ملک کو بچانے کی کوشش کر رہے ہیں، جو قومیں اپنے محسنوں کو بھولتی ہیں اْن کا اللہ ہی حافظ ہے، ہم تو پہلے ہی بہت زخم خوردہ ہیں۔کیپٹن منان الحسن شہید کے والد نے کہا کہ ہمارے بچوں نے اس ملک کیلیے جانیں قربان کیں۔
